Khuda Yaad Aa gaya!

Mujh ko shikast-e-dil ka mazaa yaad aa gaya
tum kyun udas ho gaye, kya tum ko yaad aa gaya
barse baghair hi jo ghaTa, ghir ke khul gai
ek bewafa ka ehad-e-wafa yaad aa gaya
maaNgen ge ab dua keh use bhool jaayen ham
lekin wohi jo waqt-e-dua yaad aa gaya
kehne ko zindagi thi bahut mukhtasar magar
kuch yuN basar hui keh khuda yaad a gaya
hairat hai unko dekh ke masji me aie Khumar
kya baat ho gai keh khuda yaad aa gaya

( Khumar Barabanqvi )

few lines - close to heart

Phir raha hun shauk ke darya mein be qarar
Khud hi ai manzilon ab dhundh lo mujhe
..........
Jahan rahe ga waheen raushni lutaye ga
Chiragh ka apna koi makan nahi hota
...............
Ragon mein khoon ki garmi ka maujza hai tamam
Warna aadmi pathar se mukhtalif to na tha.
............
Sanson ke silsile ko na do zindugi ka naam
jeenay ke bawajood bhi kuch loog marr gaye
...............
Kehne ko zindugi thi bahut mukhtasar magar
kuch yun basar hui keh khuda yaad aa gaya
...............
Sanson mein bhi shamil ho lahu mein bhi rawan ho
lekin mere haathon ki lakeeron mein kahaan ho
...............
Rasm e Ulfat hi ijaazat nahin deti warna
Hum bhi aisa Bhoolein ke sada Yaad karo
...............
woh Shakhs meri Lash pe aaya, Na ro saka
Uss ko merey sukoon ka kitna khayaal tha
...............
Ya khuda log banaaye thay agar pathar kay
Meray ahsaas ko sheesha na banaya hota
...............
Woh ashk ban ke Meri Chashm e tar mein rehta hai
Ajeeb shakhs hai Paani ke Ghur mein rehta hai
...............
Ahsas ka andaz badal jaata hai warna
Anchal bhi ussi taar se banta hai kafan bhi
...............
Seeney se merey zeher utarney nahin detey
Zinda rahein woh loug jo marney nahin detey